تعرف أحد ..؟؟
أنا انطوائي ..انعزالي ..مابي أعرف أحد
قولوا موسوس أو معقد المهم مابي أحد
وأكثر سؤال أواجهه في ديرتي ...تعرف أحد ؟
وأعظم شعور إنك تعيش ولا أنت بحاجة لأحد
وأغبن الأمور إن صار حايل دون حاجتك ...أي أحد
تعرف أحد ..؟؟
ما دري ثقافة مجتمع ؟ مادري حسد ؟مادري طمع ؟
أهم شي إنك ما حد لا صرت ما تعرف أحد !!
تطور العالم وراح ..واستوى ضعيف وقوي
أما هِنا ..تنبح نباح أو صير ذيب وفهلوي ..
تعرف أحد ..؟؟
إلا بسأل سؤال ما هو بأسئلة ..هو في شي اسمه نظام أو هي كِذا سبهللا ؟؟
تعرف أحد ..؟؟
لا جيت لموظف صغير لازم وواجب تمدحه
وقوم ارفعه ثم ارفعه وطيّره من دون أجنحة
وقول بيّض الله ذا الوجه ولا مانع إنك تمسحه
ولا شفت أحد سوّا كِذا ..أحذرك لا تنصحه
تعرف أحد ..؟؟
إي والله ..إلاّ أعرف أحد ..
أنا اعرف الواحد الأحد ..
أعرف اللي لا ضاق الصدر من زحمة همومه ..
وعجزت أميّز الأشوار صايبها ومخطيها
توضيت وسجدت لوجهه سجدة
وانا موقن ... أخير لنفسي من الدنيا وما فيها ..
للشاعر سالم حزام