السلام عليكم و رحمة الله و بركاته واشراكم؟ اليوم الموضوع على الادارات تع الجزائر في مختلف الاماكن، باش مانقولش كامل ، بالاك معظمكم تعامل من قبل مع الادارات و الأشخاص الي يخدمو في الادارات ، آه بلا مانقولكم ، أكيد راكم تعرفوهم كيفاش دايرين تقولشي مخيرينهم ، مرات نقول بالاك كاش مادارو كونكور تع الأسوء تعاملا في الوطن ولا الي مايحتارمش الغير قاع ، ولا بالاك أسوء الاشخاص الي مايخدموش خدمتهم أمم طبعا ماشي قاع الأشخاص الي يخدمو في الادارات ماشي ملاح ، اكيد يكونو كاينين ناس ملاح (انا مانشوفهمش بزاف لسوء حظي ) و لكن معروف على الكثير بلي كارثة ، و بالرغم انو صح مرات تكون الخدمة بزاف و الضغط أيضا و ربي يكون في عونهم، بصح ماشي معنتها يولي الواحد ماشي مليح مع الناس ، و ايضا أحيانا ناس ماهيش قارية و ماشي مثقفة و لا علاقة لها بالمناصب و يكونو حاكمينهم، (و من المفروض كل شخص يدي المنصب الي يناسبو و يقدر عليه باش يخدم خدمتو مليح). و الي تقتل الواحد انو هوما يغلطو بصح مايستعرفوش بالغلطة تاعهم ، بل يزيدو يرجعوك نتا الغالط عادي بكل بساطة ، و يعطوك مبررات مكاش منهم كامل ... في الحق مانحبش نكتب هذا النوع تع المواضيع بصح الواحد قلبو معمر منهم و ملينا و كرهنا من هكذا اشخاص . قولولي و نتوما واش رايكم ؟ هل شفتو بزاف ناس ملاح يخدمو في الادارات ؟ فرحونا و هل صراولكم مواقف مع كاش أشخاص مايتعاملوش مليح و مايخدموش خدمتهم ؟ ولا تعاملتو مع بزاف ناس ملاح ؟ و واش يقدر الواحد يدير مع الناس هادو الي مايحشموش و يعاملوا الناس بطرق سيئة ؟ المهم ان شاء الله في المستقبل يحكمو الادارات اشخاص قادرين يخدمو خدمتهم كيما يلزم و تكون معاملتهم مع الناس مليحة ، يا ربـــــ