السلام عليكم ورحمة الله وبركاته راني عاودت رجعت بشأن جوازات السفر راهي تعدلت الآن الأمور والحمد لله ورجعت كل بلدية تخدم جواز السفر مش كما قبل لما كانت الدائرة هي الي تخدم سما كل البلديات تروح للدائرة وتخدم، ونظن هذا الحل داروه من أجل البلايص الكبار، مثل العاصمة، راهو فيها غاشي كبير ربي يبارك، ممكن دائرة دار البيضاء الي هي نفسها (باب الزوار) فيها كاشي مليون ونصف نسمة، تخيلوا مثلا سكان نتاع دوائر وبلديات باتنة كامل يروحوا للولاية باش يخدموا جواز السفر .. مثلا باب الزوار راهو داخل فيها برج الكيفان + عين الطاية + درقانة + قهوة شرقي + طماريس،... كامل في فرد بلاصة انا خدمت جواز السفر هنا في المدينة نتاعنا في باتنة وعندها سنوات رحت للدائرة لقيت روحي وحدي + رحت على كاشي 11 نتاع الصباح ولا، ولا بشر غير انا برك المهم نكمل الحكاية .. كاين واحد المدينة لاصقة في المدينة نتاعنا ما تحسش بلي راهي مدينة منفصلة وانما وكأنها مع مدينتنا فرد وحدة سما ما تحتاج لا سيارة لا والو تروح ليها برجليك نورمال، المهم هاذي المدينة رحت ليها أنا اليوم للمركز البريد نتاعهم لأنو يعجبني كما نروح ما نلقى ولا واحد فيه هيا ندخل مباشرة نفري أموري ونخرج، والسبب الي خلاني نخلي المركز نتاع البريد نتاعنا هو أنو فيه غاشي بزآآآف وبالطوابير ممكن تستنى كاشي 2 سوايع باش تقضي حاجتك، ونظن كون يفيقوا بالمركز البريد المجاور وفارغ يروحوا كامل يجريوا ليه هههه وانا فقت بيه غير الشهر إلي فات المهم كما رحت اليوم للمركز البريد الي في المدينة المجاورة لقيتو مغلوق هيا سما ما عنديش الحل بغير نروح للمركز البريدي نتاع المدينة نتاعنا، هيا لما رحت استغربت المرأة الي كانت شادة أحد الشبابيك راحت بدلت من بلاصتها وحطوها في شباك آخر، وهاذي المرأة عندها سنوات وهي شادة فرد بلاصة منين نشفى وأنا صغير وهي ثم . المهم المرأة هذيك الي تبدلت البلاصة نتاعها واحد المرة وما عندهاش بزاف رحت زعما درت لاشان باش ندفع النقود هيا وانا واقف كاشي واحد ساعة ولا ومبعد قالك هيا راح نسكرو والوقت مازال باقي كاشي 15 دقيقة والعشية ما يخدموش (يوم الخميس) سما لازم نستنى لحتى يوم السبت هيا رحت نهار السبت دير لاشان واحدة ساعة هكذاك او اقل او أكثر المهم مبعد قالتلي بلي الريزو ماكانش وقالتلها بواحد نبرة نتاع التكبر هيا سما ارجع مع المساء، والحاجة الي قلقاتني اكثر أنو وعدت واحد الانسان باش نبعثلو النقود يوم الخميس واعتذرت منو وقتلو يوم صباح ومبعد زدت اعتذرت، وانا ما نحبش لما ما نكونش عند هدرتي. والمهم وانا راجع من الدار ومحبط وقاعد راسم هذيك السيناريوهات كامل في عقلي ومبعد انتبهت وقلت هاه يا سيف يخي أنت راك قادر تغير الوضع نتاعك والي يحصلك أنت السبب فيه، هيا حكمت قاعد نرسم سيناريو مليح وجميل السيدة هذيك تعامل بمعاملة مليحة ومحترمة وتبتس وانا مش مقلق وفريت أموري ووو .. لهم لما رجعت مع العشية تغيرت المعاملة نتاعها هيا قاعدة تبتسم وزادت قالت هاك اقرالي هاذي وسمحلنا وووو هيا لما فريت أموري انا عشيت فرحان هههه، المهم من ذاك وليت نروح لمركز البريد الآخر لأنو الغاشي ماكانش فيه بزاف، ولكن الي تغير اليوم في المركز نتاع البريد نتاعنا السيدة هذيك بدلولها البلاصة وزايد جابو جهاز جديد سما كما تجي تدفع الصوارد تشدهم عليك وتعطيلك الوصل مباشرة ماشي كما قبل لما كانو لازم تدير لاشان باش تدفع وتزيد تستنى مدة باش يعيطو عليك ويمدولك الوصل وهاذي العملية سما يقومو بيها زوج أشخاص سيدة تشد عليك الماندا وتروح لسيد آخر وتمدهملمو وهو يقوم بالعملية إلكترونيا ومبعد يجي يجيبلها هذاك الوصل وهي تمدو اخخخخ هاذي العملية كاشي كانو يقومو بيها عقود من الزمن ههه الحمد لله تغيرت الأمور وانا في الشهر الماضي برك قلت للوالد علاه هذوك ما يشريوش جهاز وتخدم بيه نفس السيدة في نفس الوقت وتوزع المهام على أشخاص آخرين باش ما كونش الغاشي بزاف .. واذا به الأمور تغيرت هذه الأيام والحمد لله راني نكتب بزاف، ما كنتش عارف بلي راح نكتب هكذا، ظاهرة ما نزيدش نكتب يخي ما كانش برك الخلوطة والافكار متسلسلة المهم بقى جزء صغير اذا ما يوليش كبير نكملو لاحقا ان شاء الله وشكرا جزيلا