[nadjofeva]

المشاركة الأصلية كتبت بواسطة سيف الدين

وعليكم السلام ورحمة الله وبركاته

الحمد لله نحن بخير أخت نادجو، ان شاء الله احوالكم وأحوال العائلة بخير
الحمد لله بخير و العائلة بخير (كان يخطونا برك هادو الناس).
امممم الادارات وما دارت في الشعب هذيك المظاهر الي تطرقتي ليها أخت الكريمة هي
راهي متواجدة، سواء من المعاملات او الخدمة نتاعهم الي ناقصة.
ايه
أكبر (سوء) معاملة حصلت لي في الادارة هي:

انا في العام الماضي لما كنت في العاصمة وتحديدا في باب الزوار باش نخرج جواز السفر
نتاعي شبت في الدائرة هذيك .. رحت أول مرة للدائرة باش نشوف الملفات ووو
وسقسيت على التوقيت باش نحط الملف، هيا قالك على 6 نتاع الصباح، هيا معليش، لغدوة
على 6 نتاع الصباح كنت ثم لقيتهم داروا القائمة وخلصوا، قتلهم على قداه نكونوا هنا؟ قالك
على الخمسة نتاع الصباح هيا معليش، زدت سقسيت لوخرين قالو بلي راهم يجيوا على
الساعة نتاع 3 نتاع الصباح

المهم ليوم آخر رحت انا ووليد عمي وبكرنا على 2.30 نتاع الصباح والمكان بعيد على
البيت تقريبا 30 دقيقة مشيا وزايد مع الكلاب المشردة الي صادفناهم ومع الناس الي نتاع
الخمر ومخبوطة مطايشة في الطريق فوتنا ليلة الرعب هههههه.


هيا المهم لحقنا على الساعة 3.00 نتاع الصباح ونلقاوا غاشي عظيم امام الدائرة تقول
هاذي جاوا على 1 نتاع الصباح ولا واش .. المهم لقيناهم يعمروا في القائمة نتاع الاسامي
باش تحكم الدالة نتاعك، المهم حكمنا الدالة نتاعنا، هيا سيدي واحنا قاعدين ثم لحتى 5 نتاع
الصباح، يجي مسؤول في الدائرة هذيك ويحكم يمزق القائمة وقالك مش قانوني مالا
ناضت (حرب) كلامية بينو وبين الناس، المهم انا ناس ملاح وخاطيني .

هيا سما عاودنا من جديد وماركينا الاسامي نتاعنا، روحنا على كاشي 5.30 هكذاك للدار
ورجعنا على 7.00 هكذاك، هيا دير لاشان ويبدا يعيط على الناس الي دفعت الملف نتاعها.

المهم عيط ودرنا لاشان لحتى 11 ولا مش متذكر وصلت الدالة نتاعي باش نحط الدوسي
برك، هيا شعرة عاود رجني هذاك السيد قالي الصورة مش هكذا راهي ناقصة، مزية قالو
السيد الي قدامو معليش خليه برك، مبعد كما كلت قالك ارجع نهار فلاني باش تصور.
هذا فيلم رعب صح ، ماشي الخطر الي واجهتوه في الليل الي رعب برك و واش دارو فيكم هو الرعب كثر ،
المهم الحمد لله خرجت سالامات
و درتو جواز السفر أخيرا.

المهم كما رجعت يوم فلاني مع لاشان وووو هيا في الأخير قالك سيستام حبس ههههه هيا
ارجع نهار آخر، كما رجعنا يوم آخر الحمد لله صورنا .

هذا كاآآآآآآآمل صرا في رمضان .. بصح معليش حصل خير ان شاء الله

الي يسمع تقول هذا كاشي وين راح يروح بجواز السفر نتاعو، كما قالها واحد السيد هاذو
راح يروحو للجنة هههه.
ايه كان للجنّة معليش الواحد يجوز أشهر هكاك و يحمل ، بصح للاسف ماهوش للجنة .

المهم كما جبت جواز السفر نتاعي ما صدقتش روحي هههه
مبروك أكيد بعد كل هذاك التعامل و هذيك المعاناة.

المهم في أوت هكذاك تريقلت الأمور في الادارة هذيك وماولاش فيها مشكل لأنو الوالدة
والوالد داروا جواز سفر نتاعهم ولكن عادي راهو مع الصباح كاشي على 9 دفعوا دوسي
وصوروا في نفس ليوم .. المهم طفرت فيا أنا برك

الحمد لله معليش المهم جبتوه،
و تريقلات دوكا، نورمالمو سهلو الامور تع جواز السفر الآن.

هاذي الكتيبة كنت راح نكتبها في المدونة في هذاك الوقت ومبعد قلت خلينا منهم آخخخخ

ايه الواحد ماشي برك يحب يكتب كي يشوف المعاملة نتاعهم بصح واش نديرو الله يهديهم.

المهم راني نرجع لاحقا ان شاء الله ونكمل الحكايات باش ما يبانش الرد طويل، زعما هذا
ماشي رد طويل احم حم

ممكن تكون خلوطة شوي في الكتبة راني ما عودتش مراجعة واش كتبت

وشكرا جزيلا

أهلا بكم في كل وقت.
شكرا على الرد أخ الكريم (اني غير نسنا كاش عضو ولا عضوة مايقول حتى موقف ماشي مليح و يكون مر غير بالمواقف لملاح مع الناس تع الادارات ).
ايييه انا كان نحكيلكم نزيد عليكم برك (حاليا اصلا راني نعاني مع وحد الادارة ربي يهديهم ).
شكرا مرة اخرى .