كيف تسمون هذا الشيء ^^
السلام عليكم ورحمة الله وبركاته ان شاء الله تكونوا بخير .. اليوم صدفة وانا اتجول في المدينة - احنا بعاد شوي على المدينة كاشي 7 د مشية - لقيت واحد البائع يبيع واحد حاجة احنا نسميوها ( زعرورة ) كما شفتها مباشرة تذكرت روحي كما كنت نقرا في الابتدائي وفي المتوسط كنت نشريها هي واخواتها ;nosweat ونقصد اخواتها زنجفور وكذلك البلوط ومخرgة وهاذي الاخيرة تشبه شوي الزعرورة ولكن الطعم نتاعها مختلف عليها وكذلك اللون نتاعها يكون احمر، وهي مش بنينة بالنسبة لي ههه وهاذو الحوايج ما لقيت وين نصنفها ^^ راهي توجد غير في الوقت هذا أي الخريف .. مش عارف اذا تعرفوا الاسامي الي قتلكم عليهم ولا عندهم أسامي أخرى في مناطق معينة، أو أنه هناك لا يعرفه .. ومش عارف كيفاه يسميوها بالعربية الفصحى على أقل نشوفو اذا فيها فوائد أو لا، وممكن عندها أضرار ههه نخليكم مع الصورة نتاع الزعرورة والمذاق نتاعها بنين بصح مش بزاف :cupidarrow: وممكن مع نشر الصورة راح تعرفوا اسمها، شفتو راهي تبان شوي فاسدة ;blushing أواه هذيك نتاع سما راهي طايبة مليح هههه http://www.m5zn.com/newuploads/2015/...70bcd6cf79.jpg بالمناسبة هاذي نسميوها زعرورة وكذلك كاين فاكهة الي توجد في الصيف نسميوها زعرورة وهاذي صورتها من عمي جوجل >> مليح كما عرفها، انا قلت مش راح يعرفها :p https://imagineannie.files.wordpress...of-loquats.jpg وشكرا ليكم ونشوفوكم على خير ان شاء الله الله يحفظكم ^^ |
رد: كيف تسمون هذا الشيء ^^
اقتباس:
صراحة الكلمة الوحيدة لي متأكدة فهمتها هي البلوط :( و لا أتناوله كثيرا ، و الباقي والو خاصة زنجفور ومخرgة :confused: زنجفور تنطق بالجيم ؟ و كيفاش شكلو ؟ بالنسبة للصورة الثانية حنا نقولو مْشِيمْشَة و زَعْرُور في العاصمة و الوسط ، أما في الغرب نقولو بُوعْضِيمَة ، أما الصورة الأولى مانقولولوش زعرور ولا زعرورة و مذاقها مختلف على هذه الأخيرة، لست متأكدة ان كانت الفاكهة لي في بالي أو لا (عندي مشكلة مع الصور احيانا حتى و نشوفها مانعرفهاش لازم تكون قدامي) ، واذا هي يقولولها مْزَاحْ هنا على ما أظن و طعمها مش بنين بزاف و اجي صغيرة بزاف شكرا على هذا الموضوع منكم نستفيد و بالاك يْفيدونا أعضاء آخرين ان شاء الله بتسميات أخرى |
رد: كيف تسمون هذا الشيء ^^
اقتباس:
الحمد لله أنكم بخير، ونحن كذلك بخير والحمد لله ايه زنجفور تكتب بالجيم والشكل نتاعو يكون برتقالي وصغير مثل حبة حمص ويلفو غطاء لازم ننحيو الغطاء هذاك باش ناكلوه، سما الغطاء نتاعو جاي كما مشيمشة، مش عارف اذا اسم زنجفور بالعربية أو شاوية، لانو هنا هكذاك يعيطولو. ايه الشكل نتاع الزعرورة في الصورة الأولى تكون صغيرة بزاف وتقريبا تجي في حجم نتاع حبة الحمص أو حبة الزيتون. عندنا هنا توالنا شجرة نتاع الزنجفور اذا راهو وجد نشوف نجيب الصورة نتاعو ان شاء الله. وشكرا جزيلا لك على المرور أخت الطيبة وعلى اضافة الاسامي بشأن الصورة الثانية كان الله في عونك وسدد خطاك |
رد: كيف تسمون هذا الشيء ^^
السلام عليكم ورحمة الله وبركاته الأخت الكريمة nadjo عندها واحد الزهر الله يبارك ^^ راني جبتلكم الصور من حديقة المنزل قمت بالتقاطها للتو فقط .. صورة لحبات ( الزنجفور ) وهي متساقطة على الأرض http://www.m5zn.com/newuploads/2015/...0057e3aa7b.png صورة لشجرة الزنجفور http://www.m5zn.com/newuploads/2015/...0fd735edab.png صورة لحبة الزنجفور عن قرب http://www.m5zn.com/newuploads/2015/...d8d336c875.png صورة لحبة الزنجفور بعد فتحها، لانه كما قلت للاخت nadjo حبة الزنجفور راهي عبارة عن حبة يحتويها غطاء، وباش تتكل لازم ننحيو عليها هذاك الغطاء باش ناكلوها، وايضا كما ننحيو هذاك الغطاء نحسو حبة زنجفور وكأنها عبارة عن اسفنجة وكما تلاحظون في الصورة راهي تتخللها فتحات في داخلها، ههه ما لقيت كيفاه نشرحها . http://www.m5zn.com/newuploads/2015/...438b13dcbb.png وايضا كما رحت نلتقط الصور لقيت العصافير مدايرة حالة معاه لانو راهي تحبو ومنعرف كيفاه تاكلو مع الغطاء او بدون غطاء ههه ان شاء الله أكون قد أفدتكم شكرا |
رد: كيف تسمون هذا الشيء ^^
اقتباس:
آه اذا هذا هو الزنجفور متشرفين ههه أظن أنني أعرفه و رأيته من قبل لكن لا أعلم اسمه ، و نعم أكيد استفدنا ، جزاك الله خيرا، من الشرح الذي جاء في الرد السابق جاتني في راسي غير تشوينة لأنها اجي برتقالية و صغيرة الحجم و يديرو بيها المربى بصح ماشي شرط ينحولها القشور، الاسم بالعربية الفصحى بالنسبة للزعرورة أو المزاح أو مشيمشة على ما أظن هو نفسه الزعرور و الله اعلم شكرا مرة أخرى على الصور و على الشرح |
رد: كيف تسمون هذا الشيء ^^
اقتباس:
بيه المربى، ومش عارف اذا يصلح أو لا، لأنو الزنجفور راهو فيه نواة ونواة نتاعو راهي كبيرة شوي، الحجم نتاعها تقريبا كما نواة نتاع الزيتون ولكنها تجي طويلة ومن ناحية الشكل راهي تشبه نواة نتاع التمر، وممكن لقيت الوصف نتاعو شوي راهو منفخ كما اللبابة نتاع الخبز واذا لضينا عليه راهو يولي ماكانش ;nosweat بشأن مصطلح تشوينة عمي جوجل راهو عرفو وما عرفش الزنجفور نتاعنا ;sadwalk ولكن مش عارف اذا هو نفسو زنجفور أو لا ههه لانو كما قلتِ لازم واحد يحركو بيدو وما يقدرش يعرف حاجة من خلال الصورة فقط .. هذه الصورة من جوجل http://upload.4algeria.com/do.php?img=56662 وراني لقيتهم يديرو بيه المعجون، ولكن جاني ما يشبهش الزنجفور ولا حتى الزعرورة الصغيرة .. الي في الصورة الأولى .. والله اعلم وبشأن مصطلح الزعرورة بالعربية الفصحى شكرا جزيلا لك وبارك الله فيك على الافادة شكرا لك مرة اخرى |
رد: كيف تسمون هذا الشيء ^^
السلام عليكم و رحمة الله
امم ما قدرتش نتعرف على الصور مليح ، لكن بانتلي هذا نفسو الي نسموه احنا عندنا فالغرب " النـْـبــْـقْ " ، http://upload.4algeria.com/do.php?img=56662 كاين فرق بينو و بين الزنجفور فاللون و الحجم برك ، النبق يجي شوي بني شوي احمر محترق ما نعرف كي سموه هذاك اللون و يجي اصغر فاني و صح ما يجيش بنين ، مي كي تاكلو تحس روحك كللي راك تلعب و تجيب في وقتك ببرك خخخ |
رد: كيف تسمون هذا الشيء ^^
اقتباس:
يبدو أنني سأبقى في هذا الموضوع اليوم و ياريت يدخل بقية الأعضاء أيضا نتعلمو منهم كلمات ;bye1 راهم غير الزوار (مرحبا بيكم كامل) ما قصدتًه أخ الكريم ليس أن الزنجفور هو نفسه التشوينة ;no، ليست نفس الفاكهة و انما انا فهمت ذلك من الوصف لي في الرد لي قبل تع الصور و لكن بعد أن رأيت الصور و الشرح ماهمش كيفكيف ، و حسبالي تعرفو التشوينة عندكم ، جاني هذا الزنجفور يشبه للزعرورة تع الصورة الأولى ربما الطعم أيضا لأنني لم أتذوقه هكذا أحمر أو برتقالي ، و راني تعلمت كلمة جديدة أخرى من هذا الموضوع "لضينا " لم اكن اعرف هذه الكلمة و ربما فهمت معناها من معنى الجملة فقط ، زعما معناها "نفخنا" ولا "نسفنا" ولا "نفسنا" تخلطولي ولا حاجة أخرى كامل و راني غير نخلط و بالنسبة للعم جوجل صحيح زرته أيضا و عرف كل الكلمات التي ذكرتها في ردودي ههه غير الزنجفور و مخرgة لي معرفهمش شكرا مرة أخرى |
رد: كيف تسمون هذا الشيء ^^
اقتباس:
وعليكم السلام ورحمة الله وبركاته ايه احنا ثاني عندنا النبق والوصف نتاعو كما قلتي وما شكيتش الي في الصورة راهو النبق والله أعلم. علاه انتوما ثاني عندكم الزنجفور وتسميوه هكذاك ؟ وشكرا ليك على ردك وعلى الاضافة .. دمت بخير |
رد: كيف تسمون هذا الشيء ^^
اقتباس:
للأسف ما نعرفش التشوينة ومش عارف شكلها :strongsad: بشأن الزنجفور لالا ما يشبهش الزعرورة كل واحد خلاف على آخر وخاصة في الطعم بالنسبة للزعرورة راهي فيها أكثر من نواه في داخله وتكون بشكل دائري بينما الزنجفور مثلما وصفته سابقا زايد فيه نواة واحدة فقط .. بشأن كلمة ( لضينا ) معناها بالفصحى ( ضغطنا ) وشكرا جزيلا لك أخت الكريمة على المرور، ربما عم جوجل قريبا ان شاء الله سيتم أرشفة هذا الموضوع في محركات بحثه وسيصبح يعرف الزنجفور بالصور وكذلك مخرgة ;nosweat شكرا مرة أخرى حفظك الله |
الساعة الآن 11:59 AM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
Privacy
Policy by kashkol